OECD
Organisasjonen for økonomisk samarbeid og utvikling (OECD) er ein verdsomspennande organisasjon som blant anna publiserer rapportar om utdanning årleg.
Det er i dag 31 land som er medlem i OECD, og dei er kjenneteikna av ein velutvikla marknadsøkonomi og eit relativt høgt inntektsnivå. Organisasjonen er eit samarbeidsforum, der medlemslanda drøftar økonomiske og sosiale trendar og samarbeider om å utvikle analyser og underlagsmateriale for politikkutforming. OECD har inga overnasjonal makt, men er basert på mellomstatleg samarbeid. Alle vedtak i organisasjonen må vere einstemde.
OECDs hovudpublikasjonar på utdanningsområdet er dei årlege rapportane Education at a Glance og Education Policy Analysis. Sistnemnde publikasjon presenterer OECD sine politikkanbefalingar på ulike område, medan Education at a Glance inneheld komparative data frå medlemslanda, basert på ei rekke utdanningsindikatorar. Internasjonalisering og studentmobilitet vert dekka gjennom indikator C3: ”Who studies abroad and where”.
Komparative data om forsking, teknologi og innovasjon i OECD-landa vert presenterte i publikasjonen Main Science and Technology Indicators, som kjem ut annakvart år, og i publikasjonen Science, Technology and Industry Outlook, som kjem ut årleg.