Læringspartnarskap

Samarbeidet må omfatte minst tre institusjonar frå minst tre land som deltek i EU sitt livslang læring program. Vanlegvis er det fleire enn tre i kvart prosjekt, og det kan også vere meir enn ein institusjon frå kvart land med.

I det typiske læringspartnarskapet er det mellom fire og fem europeiske organisasjonar som arbeider saman i to år. Tema for partnarskapa er mangfaldige, som ein kik på kompendia òg viser. Dei møtes eitt par gangar i året, gjerne tre frå kvar organisasjon. Prosjektsamlingane går på skift mellom dei ulike landa.

Det har vist seg at den beste måten å kome i gang med prosjekt på er å delta på eit Grundtvig kontaktseminar. Det er også utarbeidd ei handbok i " Grundtvig Learning partnership," som kan vere ein nyttig reiskap i både førebuings- og gjennomføringsfasen.

Målsetjing
Ei sentral målsetjing i programmet er at flest mogeleg institusjonar får erfaring med europeisk samarbeid. Gjennom dette tiltaket ynskjer ein òg å nå dei mindre aktørane på feltet, og gjerne dei som står i direkte kontakt med den vaksne eleven.

Målgrupper
Målgrupper omfattar dei som prosjektet til sjuande og sist skal kome til gode. Læringspartnarskap, som resten av Grundtvig-programmet, rettar seg mot all vaksenopplæring, men vil prioritere grupper som av ulike grunnar har vanskelegare tilgang til opplæring eller har behov for spesielt tilrettelagde tilbod, mellom anna:

• Sosialt og økonomisk vanskelegstilte
• Vaksne utan grunnutdanning
• Eldre
• Funksjonshemma
• Kulturelle og språklege minoritetar
• Vaksne i utkantstrøk